Noko av det vi har gjort som studentar 2012-13

Dette er noko av det vi har gjort i skuleåret 2012/13

Laga av oss studentane.

Arkitektur

I høve arkitektur hadde vi eit praktisk skapande arbeid der vi jobba i lag to og to. Målet var å lage hus av gratismateriale. Kvar gruppe hadde ulike oppgåver som utgangspunkt. Den eine gruppa skulle planleggje detaljert, ei anna gruppe skulle setje i gang utan å planleggje fyrst og den siste gruppa skulle velje om dei ville planlegge eller å gå rett på å lage huset.

Laga av oss studentane.

Laga av oss studentane.

Som ein ser blei resultata ulike. Eit hus verkar inspirert av hytte, det andre modernistisk og det siste som eit tradisjonelt hus. Ei av orsakane til at husa blei så ulike kan ha med oppgåvene kvar gruppe fekk som utgangspunkt. Det kan og ha med kva materiale som er valt, men det er òg høgst sannsynleg at orsaka til ulike hus har med at vi alle er individuelle menneske. Vi har våre eigne tankar og blir inspirert av ulike ting. Slik er det òg i skuleklasse, ingen elevar er like, slik at resultata i prosjektoppgåver vil alltid bli litt ulike.

Denne oppgåva meiner eg høver godt inn i skulesamanheng. I denne oppgåva er det mykje læring. Blant anna innan samarbeid, planlegging, refleksjonar, vurderingar, og det å bruke sine eigne idear og tankar visuelt i ein modell. Samstundes går denne oppgåva rett inn i mange delar av læreplanen under kunst og handverksfaget.  Mellom anna under arkitektur i kompetansemåla for faget står det for alle årstrinn at elevane skal kunne lage modellar av hus (LK06: 132-135). Utforminga av teksten varierer frå årstrinn til årstrinn, men bodskapen er om lag den same. Samstundes kan denne oppgåva forsvarast i høve grunnleggande ferdigheiter i faget.

Design

Vi har hatt mykje teori om kva design og redesign er for noko. Dette har vore lærerikt og interessant. Samstundes har vi hatt noko praktisk arbeid i høve dette hovudområdet i faget kunst og handverk. Blant anna hadde vi studentane med oss ulike materiale som blei lagt i ein haug på eit bord. Deretter skulle vi finne ut korleis vi, som gruppe, skulle kunne lage noko nytt og brukande av dette. Vi såg fyrst på haugen, sette oss så ned kvar for oss og teikna minst tre ulike ting, og planla i fellesskap kva som var mest matnyttig.

Vi har laga gamal type visp av bjørkekvistar. Dette var moro og samstundes ei enkel oppgåve som òg elevane skulle klare. Ein må vere sikker på at elevane då klarer å handtere ein kniv. Vi gjekk ut og skar av tynne kvistar frå bjørk og sette oss så ned og fjerna barken ved hjelp av kniv. Når dette var gjort samla vi saman kvistane og såg til at det var lik lengd på alle saman. Deretter samla vi kvistane i handa og knytte to tau hardt rundt der ein skal halde på vispen. Og vips, så er vispen ferdig.

Vispen min

For å gjere den ekstra fin kan ein bruke tynne kvistar til å tvinne rundt vispen. For meir informasjon om framgang, eller ein litt annan framgang besøk denne sida: http://www.slojdeniskogen.se/slojden/sfs/tillverka-en-visp/1/.

Vi har marmorert bileter, noko som var heilt greitt. Resultata blei flotte, men eg trur dette er noko som høver seg i høgare årstrinn. Det blir litt søl, og lukta vil nok mange reagere på. Vi fekk utdelt informasjon om marmorering på samlinga. Her fekk vi innsikt i historia til marmoreringa, samstundes til forklaring på korleis ein gjer det. Trykk her for å få vite korleis ein skal marmorere. Det ein treng er oljemaling på tube, terpentin, firkanta stamp som kan romme omlag 10 liter, papir, beger og rørepinner og kluter til å tørke det ut.

Nokre av resultata frå oss studentane.

Vi har på ei samling vore med på å lage papir og bok.  For å lage papir reiv vi opp avispapir i bitar. Vi la så papiret i blaut. Deretter nytta vi ein hurtigmiksar medan papiret låg i vatn og miksa det i hop. Vi brukte ca. ¾ vatn. Vi la så blandinga i ei låg balje, og så brukte vi ei ramme med netting inni og la den loddrett ned i balja. Medan den er i baljen snudde vi ramma loddrett fram og tilbake. Då legg det seg papir på ramma. Løfta så ramma rett opp av baljen og la ramma opp ned på eit bord oppå ein fuktig klut. Trykka så av overflødig vatn med ein svamp på baksida av ramma. No måtte vi passe på at vi lyfta ramma forsiktig opp når vi skulle ta den av. Då skal papiret ligge att på kluten. Deretter er det berre å la papiret liggje å tørke. Eventuelt kan ein hurtigtørke, noko som kan vere aktuelt i skulen, ved å bruke strykejern, hårfønar eller å setje den i omnen på svak varme. Før det er tørka er det mogleg å lage mønster og anna på papirbiten.

Boka eg lagde

Når ein lager bok, kan dette gjerast på mange måtar. Vi nytta ulike typar papir, også av dei vi lagde sjølve. Boka eg har laga vil fylgje med som del av loggen på eksamen. Ein viktig del her er å la noko gå att i heile boka, ein detalj eller noko anna.

Designøvingane vi har hatt heng godt i hop med læreplanen med design. Dette er oppgåver ein trygt kan bruke i skulen, samstundes som ein då når dei kompetansemåla som er satt.

Kunst

Når det gjeld kunst har vi òg hatt noko teori rundt emnet. Vi har blant anna lært om ulike typar kunst og om ulike kunstnarar. Vi har hatt nokre grunnleggjande øvingar som handlar om teikning. Dette omhandlar litt om grunnformar, skygger og tonar og enkle teikneøvingar. Samstundes er dette noko som må øvast inn, også heime. Vidare har vi i eksamensoppgåve å teikne eller ta bileter av hus. Eg har valt å teikne hus og desse kan sjåast på bloggen, samstundes som desse blir tekne med til eksamensutstillinga. Har vidare forsøkt meg på å teikne ansikt, og dette blir ein del av loggen.

Øving på skuggelegging (eple)

Teikneøvingar

Også kunsten som vi har hatt på samlingane heng godt i hop med læreplanen. Vi har samtala om ulike bileter, vi har brukt dekorative element frå eigne arbeid (spesielt då med tanke på design-oppgåva vår), samtala om form, lys og skygge og mykje meir.

Vi har og drive med med farging av tøy. Det var både moro og interessant. Resultata blei eg sånn passe fornøgd med. 

Eit av resultata.

Det ein måtte passe på her var at tekstilen ein skulle bruke måtte vere rein. Vidare måtte vi planlegge mønsteret vi ønska å ha, før ein då bretta eller surra tekstilen for å få isolert eit mønster. Deretter var det å leggje dette opp i eit fargebad.

• Fargebadet bestod av natriumhydrosulfat (1ts.), farge (1 ts.) og kaustisk soda (1 ts.). 1 ts. per liter vatn. 
• Bland so den ønska fargemengda med ca 1 liter vatn som skal vere omlag 50 grader opp i eit litermål. Røyr godt om. 
• Hell dette så i ei kjele. Bland så inn natriumhydrosulfatet og den kaustiske sodaen, røyr godt inn. 
• La fargeblandinga kvile i omlag 10 minutt. Så er det berre å leggje tekstilen forsiktig opp i fargebadet. 
• La det liggje der i 10 minutt, ta tekstilen opp av vatnet og skyll det av med kaldt vatn. Ta vekk isoleringa på tekstilet, og skyll på nytt. 
• Då er tøyet ferdig farga, heng dette opp til tørk.